拍拖易 DayDay Go Dating

SEX 性愛

【現代紅娘每週大爆料】小三出現，誰責任最大？

當小三出現，好多時我地都會怪出軌者，但究竟係咪真係所有責任都係喺佢身上呢？

有人話當伴侶出軌，其實雙方都有責任，對於呢點，HK Romance Dating創辦人Anita張惠萍就認同7成，認為另外3成都係貪新鮮，一時貪玩嘅。Anita有位女性朋友曾經出軌，佢成日俾意見先生，對方結婚前成日應承佢有咩目標同埋婚後會點樣點樣照顧屋企，但婚後好hea，令女性朋友好灰心。另外其他女仔出軌好多時都係有相近原因，佢地見男方冇結婚計劃，一直唔見佢有咩行動。好多女仔想安心，因為佢地有生育限制，希望見到你有承擔，最後發現你咩都唔做，女仔就會心灰意冷，但因為有感情佢又唔捨得走。當呢個時候遇到心動對象，佢最後就忍唔住出軌。男人會怪佢地，但如果當日大家做好啲，女仔就唔會咁。

至於男人出軌，有可能係因為見到伴侶愈來愈hea，變得不修邊幅。亦有好多係因為老婆好多挑剔，成日唔識欣賞男方，好多埋怨，令男士好有壓力。呢個時候當公司或身邊遇到個溫柔體貼女仔，好識欣賞佢而大家又啱傾，朝夕相對下男方感情就忍唔住轉移到佢身上。無論男女，都應該多讚美同欣賞伴侶，一齊為未來努力，令大家冇意欲出軌。

當然唔少富豪因為多資源，即使佢地有唔錯正印，都喜歡周圍識人。不過現今女仔事業唔錯，隨時可以走人。部分女仔會原諒對方，但Anita奉勸大家唔好，因為你心裡始終有條刺。除非對方只係一次犯錯，同埋有心改，否則唔好認為原諒係應份，千萬唔好俾機會佢。

如果大家心癢癢又或已出緊軌，Anita奉勸大家儘快2揀1，以避免傷害咁多人。如果你性格容易受引誘，就應減少同異性單獨相處機會。另外要同伴侶好好溝通，唔好用感情問題黎做出軌藉口，應該彼此關懷大家。