拍拖易 DayDay Go Dating

LIVING 生活

【現代紅娘每週大爆料】透過幾招動作俾人知道你係有禮儀教養嘅人

無論各位參加過Speed Dating未，今次都好應該留意影片，HK Romance Dating創辦人Anita張惠萍會私人醒大家貼士，俾你透過幾招動作令人知道你係有禮儀教養嘅人！

首先你要表現有禮貌，一開始讓人揀食物先，唔好事事以自己為先，曾經有Speed Dating參加者搶遊戲form，好怕執輸咁，都係要戒嘅。大家要表現得知書識禮，有習慣讓人。

到傾偈時，Speed Dating參加者要避免表現對任何事都冇興趣，因為咁會顯得你冇資源又冇朋友。大家都有生活、工作同朋友架嘛，當中一定有正面事值得分享嘅。各位唔好成日諗自己係好悶好宅嘅人，覺得冇事值得分享，因為人地會想像到你係好冇資源嘅人。

曾經有位Speed Dating參加者表示佢閒時會聽歌跑步，呢啲活動都係唔使好多資源已可做到。講完後人地會有興趣你會聽咩歌，覺得你係有情調嘅人，好奇你聽流行曲定古典歌。興趣冇分高低，顯示到自己喜好就好。

大家亦可分享旅行同生活習慣經驗，你唔係一定成日去歐洲旅行先分享得，就算本地遊都可以架。過程中都係志在分享，俾人睇到你嘅溝通能力同見到你願唔願意分享。

另外大家可多主導對方，特別係男士，可問對方意見，顯示出你係alpha male，令人留下深刻印象。就算女士都可幫手帶動話題，令人覺得輕鬆啲。大家唔好猜度太多，放鬆就好。

最後要留意飲食禮儀，大家斯文啲，細細啖咁食，避免點汁醬太多食物，令個咀太污糟。如果食牛排，就食一啖先切一啖，唔好一黎就切哂。大家又要表現大方，避免比較食物。曾經有位Speed Dating參加者同人share食物時，提示大家只揀較貴食物先抵，仲有一知有兩杯飲品，未飲完第一杯都即刻舉手話要。唔大體怕蝕底咁款嘅表現，好令人卻步架。